काठमाडौँ, कात्तिक ११ –
फ्लाइ नेपा ट्राभल्सको आयोजनामा अमेरिकाका विभिन्न सहरमा आयोजित तीन महिनाको सांगीतिक यात्रा ‘अब सुन्छ अमेरिका’ सकिएको छ। सुरुवातमा गायक बद्री पंगेनी, प्रताप दास र गायिका कला लम्साल तथा एलिना चौहान सहभागी थिए। तर, यात्रा बीचमा कला लम्साल बिरामी परेर नेपाल फर्किएपछि विवाद उत्पन्न भएको थियो।
त्यसपछि बाँकी कलाकारहरूले टुर पूरा गरे। तर सोमबार राति गायिका एलिना चौहानले पनि फेसबुकमार्फत आयोजकमाथि व्यवहारमा अपमान गरेको आरोप लगाइन्।
उनले लेखेकी छन्, “कलाकारलाई सम्मान होइन, नोकरझैँ व्यवहार गरियो, कसैले कैदीझैँ महसुस गरे।”
एलिनाले कलाकारले धनभन्दा बढी इज्जत र कदर खोज्ने बताउँदै भविष्यमा कसैले यस्ता अपमान सहनु नपरोस् भन्ने चाहना व्यक्त गरेकी छन्।
