हरेक वर्षझैँ यसपटक पनि नयाँ वर्षको अवसरमा नेपाली फिल्म बजार तातिने संकेत देखिएको छ। चैत २७ गते एकैसाथ ‘राम नाम सत्य’, ‘३६ को आँकडा’ र ‘डल्लेले इन्ट्री मार्यो’ रिलिज हुने तयारीमा छन् भने बैशाख १ गते ‘पहाड’ प्रदर्शनमा आउनेछ।
तर, यीमध्ये ‘३६ को आँकडा’ भने सुरुदेखि नै अन्योलमा देखिएको छ। फिल्मको छायांकन सकिएर सम्पादन अन्तिम चरणमा पुगेको भए पनि अहिलेसम्म कुनै प्रचार सामग्री सार्वजनिक गरिएको छैन। न कलाकारहरू प्रचारमा सक्रिय देखिएका छन्।
फिल्मकी मुख्य अभिनेत्री रेखा थापा अहिले आफ्नै निर्देशनमा बनिरहेको नयाँ फिल्म ‘माया भनेकै यस्तो होला’को छायांकनमा व्यस्त छिन्। यसले पनि फिल्मको प्रचार प्रभावित भएको देखिन्छ।
यता निर्देशक सवीर श्रेष्ठ भने फिल्मको रिलिज मिति सार्ने पक्षमा देखिएका छन्। चुनावका कारण समयमै प्रचार गर्न नपाएको र अब समय कम रहेको भन्दै उनले रिलिजबारे पुनर्विचार भइरहेको बताएका छन्। यद्यपि, निर्माण टिमका केही सदस्यहरू भने मिति नसार्ने पक्षमा छन्।
रेखा थापा र सवीर श्रेष्ठको संयुक्त निर्माणमा बनेको यस फिल्ममा निरूता सिंह, पूजा शर्मा, महेश त्रिपाठी, पुष्प खड्का र निशा अधिकारीलगायत कलाकारहरूको अभिनय रहेको छ। फिल्ममा रेखा थापा डिएसपीको भूमिकामा देखिँदैछिन् भने पूजा शर्मा उनकी बहिनीको भूमिकामा छिन्। दिदी–बहिनीबीचको कटु सम्बन्ध फिल्मको मुख्य कथा हो।
- अब केही दिनभित्रै ‘३६ को आँकडा’को रिलिज हुने कि सर्ने भन्ने टुंगो लाग्ने अपेक्षा गरिएको छ।
कैलाली । चलचित्र पत्रकार संघ नेपाल, कैलाली शाखाको दोस्रो जिल्ला अधिवेशन सोमबार सम्पन्न भएको छ । अधिवेशनले नयाँ कार्यसमिति चयन गरेको छ ।
संघका केन्द्रीय अध्यक्ष समिर बलामीको प्रमुख आतिथ्यतामा सम्पन्न अधिवेशनबाट विवेक नागरी अध्यक्षमा निर्वाचित भएका छन् ।
नवनिर्वाचित कार्यसमितिको उपाध्यक्षमा रमा चन्द, सचिवमा लोकु सिंह ठकुरी, कोषाध्यक्षमा यमुना साउँद तथा सह–सचिवमा यज्ञराज अवस्थी चयन भएका छन् ।
त्यसैगरी सदस्यहरूमा रक्षा बगचन, राजु चौधरी, विरेन्द्र सिंह, सावित्री जोशी र महेन्द्र चौधरी चयन भएका छन् ।
नवनिर्वाचित अध्यक्ष नागरीले आफूलाई विश्वास गरी जिम्मेवारी दिएकोमा सबैप्रति आभार व्यक्त गर्दै आगामी दिनमा चलचित्र पत्रकारिताको विकास र सुदृढीकरणका लागि सक्रिय रहने प्रतिबद्धता जनाएका छन् ।
