डोटी — सुदूरपश्चिम प्रदेशको डोटी जिल्लास्थित बोगटान फुड्सिल र बडीकेदार गाउँपालिकाको सन्धि क्षेत्रमा अवस्थित पवित्र तीर्थस्थल बडिकेदार धाममा यस वर्ष कार्तिक १६ गतेदेखि १८ गतेसम्म “बडिकेदार धाम बृहत् मेला–२०८२” आयोजना हुने भएको छ।
बडिकेदार क्षेत्र पर्यटन विकास तथा व्यवस्थापन समितिका नि. कार्यकारी अधिकृत तथा मेला आयोजक समिति संयोजक दीपेन्द्र राज सिराडीका अनुसार मेलामा डोटी, अछाम, बैतडी, दार्चुला, कैलाली, कञ्चनपुर, बर्दिया, बाँके, दाङ लगायतका जिल्लासहित भारतका कुमाउँ र उत्तर प्रदेश क्षेत्रका भक्तजनहरूको समेत सहभागिता रहने अपेक्षा गरिएको छ।
तीन दिनसम्म सञ्चालन हुने मेलामा देउडा गीत, रतौली नाच, धामी–झाँकी, डेउराहरूको प्रदर्शन र पुजा–आजाजस्ता धार्मिक अनुष्ठानहरू प्रमुख आकर्षण रहनेछन्।
मेलाको उद्देश्य धार्मिक आस्था, सांस्कृतिक परम्परा र पर्यटन प्रवर्द्धनलाई एकैसाथ जोड्ने रहेको सिराडीले बताए।
भगवान् महादेवको पवित्र स्वरूप बडिकेदारको आराधना हुने यो स्थल धार्मिक मात्र नभई सांस्कृतिक र पर्यटन दृष्टिले पनि अत्यन्त महत्त्वपूर्ण मानिन्छ।
डोटीको बोगटान फुड्सिल गाउँपालिका हुँदै वा धनगढी–अत्तरिया–सहजपुर–बीपीनगर–अत्तरकाँडा मार्ग हुँदै बडिकेदार धामसम्म पुग्न सकिन्छ।
बाटो कठिन भए पनि यहाँ पुग्ने भक्तजनहरू भन्छन् — “थकाइ होइन, शान्ति भेटियो।”
प्राकृतिक सुन्दरता, धार्मिक आस्था र सांस्कृतिक पहिचानको अद्भुत संगम बनेको बडिकेदार धाम अहिले प्रदेशकै प्रमुख धार्मिक गन्तव्यको रूपमा परिचित बन्दै गएको छ।
डडेल्धुरा — आज र भोलि कात्तिक १४ र १५ गते हुने लाटागन्यापको मेला (बडालकी जाँत) मा भक्तजनका लागि नि:शुल्क चियापान तथा शुद्ध पिउने पानी वितरण कार्यक्रम आयोजना गरिने भएको छ।
यो कार्यक्रम होटल जमघट डडेल्धुराका सञ्चालक उमेश देउबा र सिद्धराज फुलाराको व्यवस्थापनमा, साथै विशेष सहयोगीहरूको सहयोगमा सञ्चालन गरिने जनाइएको छ।
सञ्चालक देउबाका अनुसार, मेलामा आउने भक्तजन र जेष्ठ नागरिकहरूलाई सहज र सन्तोषजनक सेवा पुर्याउनका लागि यो नि:शुल्क वितरण कार्यक्रमको आयोजना गरिएको हो।
👉 कार्यक्रमका मुख्य आकर्षणहरू:
- नि:शुल्क तातो चियापान
- शुद्ध पिउने पानीको सहज वितरण
- भक्तजन र जेष्ठ नागरिकमैत्री सेवा
उक्त सामाजिक पहलले मेलामा सहभागी हुने भक्तजनहरूलाई थप सहज र आत्मीय वातावरण प्रदान गर्ने अपेक्षा गरिएको छ।
कैलाली कार्तिक १४
गोदावरी नगरपालिकाले आफ्नो स्वास्थ्य सेवामा अर्को महत्वपूर्ण उपलब्धि जोडेको छ। हालै प्रदेश स्वास्थ्य आपूर्ती केन्द्रको सहयोगमा १६ लाख रुपैयाँ मूल्यको ग्रामीण अल्ट्रासाउण्ड मेसिन नगरपालिकाले प्राप्त गरेको छ।
यो मेसिन विशेषगरी दूरदराजका गर्भवती आमाहरूका लागि सुरक्षित र सहज स्वास्थ्य सेवा उपलब्ध गराउने उद्देश्यले जडान गरिएको हो।
नगरपालिकाले यसलाई “प्रत्येक आमासम्म स्वास्थ्य सेवा, हरेक घरमा मुस्कान” भन्ने लक्ष्यसँग जोडेको छ।
यो उपलब्धि हालैको जेन्जी आन्दोलनबाट भएको आगजनीमा नगरपालिकाको भवनसहित स्वास्थ्य उपकरणहरू क्षति भएपछि प्राप्त भएको राहतपूर्ण कदमका रूपमा लिइएको छ।
स्वास्थ्य सामग्री हस्तान्तरण कार्यक्रममा सुदूरपश्चिम प्रदेशका सामाजिक विकास मन्त्री मेघराज खड्का र प्रदेश स्वास्थ्य आपूर्ती केन्द्रका प्रमुख जनक ढुंगाना उपस्थित थिए।
नगर प्रमुख बिरेन्द्र भट्टले मन्त्री खड्का, प्रमुख ढुंगाना र सम्पूर्ण सहयोगी संस्थाप्रति आभार व्यक्त गर्दै भने,
“यो मेसिनले अब दुर्गम बस्तीका आमाहरूलाई नजिकैबाट गुणस्तरीय स्वास्थ्य सेवा प्राप्त गर्न सहज बनाउनेछ। गोदावरी अब विकास र स्वास्थ्य सेवाको नयाँ यात्रामा अघि बढ्दैछ।”
नगरपालिकाले आगामी दिनमा अन्य स्वास्थ्य केन्द्रहरूमा पनि आधुनिक उपकरण विस्तार गर्ने योजना बनाएको जनाएको छ
